ಹಂತ = A phase

ನಗುವವರು ಇಲ್ಲ

ಅಳುವವರೂ ಇಲ್ಲ 

ಕುಳಿತು ಆಡುವವರಿಲ್ಲ, ಕೂಡಿ ನಡೆಯುವವರಿಲ್ಲ !

ಹರಟೆ ಹೊಡೆದದ್ದಿಲ್ಲ

ಹಾಡು ಕೇಳಿದುದಿಲ್ಲ , ಹಾಡಿದಿದೂ ಇಲ್ಲ 

ಒಲ್ಲೆನೆನ್ದತ್ತರೂ ಮನ ,

ಬಿಡಲಿಲ್ಲ ಈ ಜನ , ಒತ್ತಡವನೇ ಹೇರಿದರು 

ಕರುಣೆ ಇಲ್ಲದೆ ಪೈಪೋಟಿಯೊಂದಿಗೆ ದ್ವೆಷವನೆ ತುಂಬಿದರು !!

ಅತಿ ಉತ್ಸಾಹದಿ ಬಯಸಿರುತ್ತಿದ್ದೆ ಜಯವ ಎಲ್ಲದರಲ್ಲಿ 

ಪಡೆದೆನೆಂದರೆ ಜಯವ 

ಸಂಭ್ರಮವೂ ಇಲ್ಲ ದುಃಖವೂ ಇರಲಿಲ್ಲ !

ಬಯಸಿದ್ದು ತಪ್ಪೇ ?

ಬೆನ್ನು ಬಡಿಯಲು ಒಂಟಿ ಹಸ್ತವ  ??

ತಲೆಯನಿಟ್ಟು ಪವಡಿಸೆ ತೊಡೆಯೊಂದ ಬೇಡಿದಿದೂ ತಪ್ಪೇ ??

ಯಾವುವೂ ಇಲ್ಲ ಯಾರೂ ಇಲ್ಲ 

ಕರುಣೆ ಇಲ್ಲದ ಒತ್ತಡದಿ 

ನನಗಿರುವುದೊಂದೇ ಬೇಗುದಿ ಎಲ್ಲ !!

ನಾನೇನು ಸಾಚಾ , ಸರ್ವ ಸಂಪನ್ನನಲ್ಲ ಬಿಡಿ 

ನಾನೂ ನಿಮ್ಮಂತೆ , ನಿನ್ನಂತೆ .

ಹಠವುಂಟು , ದ್ವೇಷವೂ ವುಂಟು ,

ಬರೆಯಲು ಪೆನ್ನು ಕೊಡದಿಹ , ಬರಡು ಮನದವ ನಾ !!

ಓಡಿರುವೆ ಬಿದ್ದಿರುವೆ ,

ನೆಲದಲಿ ಬಿದ್ದ ಮೊಳೆಯೊಂದ ಕಂಡು ಬೆನ್ನು ಬಾಗಿಸಿರುವೆ 

ಆದರೂ ,

ಬಯಸಿದೆ ಬಯಸುವೆ , 

commercial ಅಲ್ಲದ  ಸ್ವಾರ್ಥವಿಲ್ಲದ ಚೂರು ಭಾವವ ,

ಹಂಬಲದಿ ಆಸೆಯಲಿ .

ಏನು ಮಾಡುವುದು , ಸಿಗುವುದು 

ಮತ್ತದೇ ಏಕಾಂಗಿತನ , ನಂಬುಗೆ ಇಲ್ಲದ ನನ್ನ ಮನ 

ಮತ್ತದೇ ಅಳು , ಮತ್ತದೇ ಹುಚ್ಚು ಏಕಾಂಗಿ ನಗು        !!

Beru

---

                                          ಬೇರು
                          ಅವನ
                         ಗೋರಿಯ ಮೇಲೆ
                         ಮಸಣದ್ಹೂವದು
                         ಹುಟ್ಟಿ , ಅರಳಿ ಕಂಪಿಸೆ
                         ಜೇನೊಂದು
                         ಗಂಧವ ಹೀರಿ , ಹೀರಿ ನೆಕ್ಕಿತದು !
                         ಅಲೆಅಲೆದು
                         ಕಾಡಮನೆಯೊಳು ಅಡಗಿ
                         ಚಂದದಿ ಗೂಡನಿಕ್ಕಿರೆ ,
                         ಹುಡುಹುಡುಕಿ
                         ಕಾಡಕರಿಯನು ಬಂದ !!
                         ಗೂಡನೊಡೆದ
                         ಹುಟ್ಟನ್ಹಿಂಡಿದ !
                         ಪೇಟೆಯೊಳು ಮಾರೆ ,
                         ಜನ ನೆಕ್ಕಿದರು
                         ದೇವರಿಗೆ ಎಡೆ ಹಿಡಿದರು !
                         ನಮ್ಮದೆಲ್ಲ
                         ಹೆಣದ ಮೇಲಿನ ಬದುಕು  ||

Kolada Kamala

---

''' ಕೊಳದ ಕಮಲ ''




ಕೊಳೆತು ನಿಂತ
ಕೊಳದಿ ,
ಕಮಲ ಅರಳಿತ್ತು ,
ಅಲೆಮಾರಿ ವಿಧಿ ,
ವಾಸ್ತವ್ಯ ಹೂಡಿತ್ತು |
ಭೂಮಿ ಬರಡಾದರೆನಂತೆ ?
ರಾಗಿಯ ಕಾಳೊಂದು
ಕರಿಯ ತೆನೆ ಹಾಕಿತ್ತು |
ಕಡಗೋಲಿನಡಿ, ನೊಂದ
ಮಜ್ಜಿಗೆಯ ಜಡ ಜಿಡ್ಡು
ಬೆಣ್ಣೆಯಾಗಿ ತೇಲಿತ್ತು
ತುಪ್ಪದಿ ಕಂಪಿಸಿತ್ತು |
ರವಿಯು ,
ಮಲಗುವ ಮುನ್ನ
ಕಮಲ ನಲುಗಿತ್ತು ,
ರಾಗಿ ಹಿಟ್ಟಾಗಿತ್ತು
ಮಜ್ಜಿಗೆಯನ್ನ ಹುಳಿ
ಮೈಲಿಗೆ ಮಾಡಿತ್ತು  ||

Aakrandana

                                     '' ಆಕ್ರಂದನ ''




                              ಬದುಕು
                              ಬಲು ಭಾರ
                              ಒಂಟಿ ಮನಕೆ , ಒಬ್ಬಂಟಿಕೆ.
                              ತತ್ವಗಳಲೇನೋ  ತಥ್ಯವಿದೆ ,
                              ನಂಬಿ   , ನಡೆಯೆ..
                              ನಿನ್ನ
                              ತಿಥಿಯದು ದಿಟ !!
                              ಛೇಡಿಕೆಯ ಛಡಿ ಏಟು
                              ಕಷ್ಟಗಳ
                              ಕಣ್ಣೀರ ಕೋಡಿ  !
                              ಕೊರಳು ಕಟ್ಟಿ ಬಂದರೂ
                              ಕಣ್ಣಲಿ ಹನಿ ತೇಲಿದರೂ
                              ನುಂಗಬೇಕು
                              ಮತ್ತೆ ನಗಬೇಕು  !
                              ನಿನಗೆ ನೀ
                              ಕಚಗುಳಿ ಇಡುತಿರಬೇಕು    || 

Daatu

                                      ''ದಾಟು ''



                                 ಒಳಿತೆಂಬುದದು
                            ಯಾರ ತಾತನ ಗಂಟು !?
                            ಮನ ತೆರೆದು
                            ಮತಿ ಹಿಡಿದು
                            ಮಾತನಾಡಿದರಾಯ್ತು |
                            ಖುಷಿ ತಿಂದು , ಖುಷಿ ಹಂಚಿ
                            ಬೀಗಿದರಾಯ್ತು|
                            ಮಿತಿಯಿಟ್ಟು ವದನದಲಿ
                            ಕೈಯ ಕುಲುಕಿದರಾಯ್ತು|
                            ಹೊನ್ನಿರಲಿ
                            ಮಣ್ಣಿರಲಿ
                            ಮನಕೆ ಹದವಿದ್ದರಾಯ್ತು
                            ಅವನೇ ಮನುಜ   ||

Hatha

                                      '' ಹಠ ''

                                      ಬದುಕು
                                      ಬೆಂಗಾಡಲ್ಲ,
                                      ಬರಿಯ ಮರಳಿಲ್ಲ ,
                                      ಹಸಿರ ಎಲೆಯೂ ಅಲ್ಲ , ಮೆತ್ತನೆಯ ಹಾಸಲ್ಲ ,
                                      ಎಲ್ಲ ಮಿಶ್ರಣವಿಹುದು
                                      ತುಸು ಉಪ್ಪು , ತುಸು ಸಿಹಿಯು
                                     ಎದೆ  ಕಟ್ಟು ,
                                     ನಡ ಕಟ್ಟು !
                                     ತೋಳ ಬಿಗಿ !
                                     ಎಡವುದಿದೆ , ಮತ್ತೆ ಓಡುವುದು
                                     ನಿಲಬೇಡ ನಡೆ ಮುಂದೆ
                                     ಹರಿಯುತ , ಝುಳು ಝುಳು ಎನುತ
                                     ಮುಳ್ಳಿರಲಿ, ಕಲ್ಲಿರಲಿ
                                     ಇಳುಕಿನೆಡೆಗೆ
                                     ಗುರಿಯನೈದುವೆಡೆಗೆ
                                     ಸಾರ್ಥಕ್ಯದೆಡೆಗೆ     ||

Nepa

                                        '' ನೆಪ ''

                          
                            ಸಾಧನೆಯoಬುದದು 
                            ಸಾರ್ಥಕ್ಯದ   ಕುರುಹೇ   ??
                            ಮೂಢ  !!!
                            ಅಂತಹುದೇನಿಲ್ಲ !?!  , ತಿಳಿ |
                            ಕೆರೆಯ ಮಣ್ಣಲಿ ,
                            ಗಣಪನ ಮಾಡಿ
                            ಮೆರವಣಿಗೆಯಲಿ ಮೆರೆಸಿ
                            ಭಾವಿಗೆಸೆದಂತೆ   !!!!!


                            ಕಾಡುಮಲ್ಲಿಗೆ ಗಿಡವ
                            ಕೊಡವಿ ,
                            ದಂಡೆ ಕಟ್ಟಿದಂತೆ !

                            ನಾನೆ೦ಬುದರಸ್ತಿತ್ವಕ್ಕೆ

                            ಉಸಿರ ನೀಡಿದಂತೆ   ||